Во израелските напади во текот на ноќта убиени десетици Палестинци

ИСТАНБУЛ (АА) - Израелската армија уби десетици Палестинци и рани многумина во нападите на многу делови на Појасот Газа во текот на ноќта, јавува Анадолу.

Израелските сили ги продолжуваат нападите врз Газа веќе 136 дена. Во Појасот Газа има голема хуманитарна катастрофа, луѓето се гладни и жедни.

Официјалната палестинска агенција ВАФА објави дека израелските сили во текот на ноќта извршиле интензивни напади од воздух, копно и море на различни точки, особено врз центарот на градот Газа.

Најмалку десетмина Палестинци загинаа, а десетици се ранети во воздушните и копнените напади извршени од израелската армија врз куќи во регионите Дејр ал Балах, Нусајрат, Ез-Зеваиде, Бурајџ и Ал-Мегази во централниот дел на Појасот Газа.

Имаше и мртви и повредени во артилериските напади врз куќи во населбата Ез-Зејтун, која се наоѓа во југоисточниот дел на градот Газа.

Во округот Римал, во западниот дел на градот, израелски воени авиони бомбардираа најмалку две куќи, а во нападот беа повредени најмалку шест лица.

Израелската армија силно ја бомбардираше областа околу болницата Амал, која се наоѓа во јужниот дел на Појасот Газа.

Покрај тоа, израелските сили беа распоредени во близина на Алжирската специјализирана болница, која се наоѓа во источниот дел на Хан Јунис.

Израелската армија бомбардираше различни делови на градот Рафа во јужниот дел на Газа од воздух и море, а во интензивното бомбардирање беа повредени десетици Палестинци.