Necva Taştan Sevinç
04 Јуни 2025•Ажурирај: 05 Јуни 2025
ИСТАНБУЛ (АА) - Германскиот град Келн денес спроведува една од најголемите евакуации од времето на Втората светска војна, откако беа откриени три неексплодирани бомби, јавува Анадолу.
Приближно 20.000 жители се евакуираат додека екипите за деминирање се подготвуваат да ги деактивираат двете бомби од 20 тони и една од 10 тони, сите опремени со ударни запалки, јавува германскиот јавен радиодифузер ВДР (WDR).
Зоната за евакуација ги опфаќа централните делови на градот, вклучувајќи делови од стариот град, при што се затворени 58 хотели, големи музеи, училишта, градинки и административни згради.
Мостовите Хоенцолерн, Дојц и Северинс преку реката Рајна се затворени, како и железничката станица Келн Месе/Дојц.
Германската железница „Дојче бан“ предупреди на значителни доцнења и откажувања на возовите, меѓу кои и брзата линија ИЦЕ Спринтер меѓу Келн и Берлин, како и некои линии до Штутгарт. Возовите се пренасочуваат, а доцнењата достигнуваат и до 10 минути.
Градските власти во Келн соопштија дека евакуацијата и затворањата започнале во 8 часот наутро по локално време. Граѓаните кои одбиваат да се евакуираат ќе бидат принудно оддалечени со полициска интервенција.
Отворени се два прифатни центри за раселените лица – еден во изложбената сала 10.1, а друг во Средното стручно училиште „Хумболтштрасе“. Не е дозволено носење домашни миленичиња во овие простории.
Големи компании, како што е РТЛ Дојчланд (RTL Deutschland), преминаа на работа на далечина, додека дел од телевизиските емисии се префрлени на снимање во Берлин за денот.
Точниот термин кога ќе се изврши деактивирањето на бомбите сè уште не е познат.
