Германија: НАТО нема да биде страна во војната во Украина

БЕРЛИН (АА) - Германија денеска вети континуирана поддршка за Украина во нејзината војна со Русија, но го отфрли директното учество на НАТО во конфликтот, јавува Агенција Анадолија (АА).

Обраќајќи им се на пратениците за време на дебатата за буџетот, германскиот канцелар Олаф Шолц предупреди дека предлозите за мировната мисија на НАТО или за зона на забранети летови во Украина можат да предизвикаат поголем конфликт.

„НАТО нема да стане страна во војната. Ние сме во договор со нашите европски сојузници и со САД. Ова е прашање на разум и сѐ друго би било неодговорно“, додаде тој.

Германскиот канцелар рече дека западните санкции против Русија почнаа да го покажуваат своето влијание и дека тие наскоро можат да донесат уште построги мерки ако рускиот претседател Владимир Путин не ја прекине агресијата.

„Путин треба да ја разбере вистината за војната во Украина“, рече тој. „Вистината е дека војната ја уништува Украина. Но со војната, Путин, исто така, ја уништува и иднината на Русија.“

Шолц го обнови неговиот повик кон рускиот претседател Владимир Путин веднаш да ги прекине сите борбени операции во Украина и да ги повлече руските војници од земјата.