Германија повикa на итен прекин на убиствата во Судан

БЕРЛИН (АА) - Германија денес повика на итен прекин на „убиствата, силувањата и тортурата“ во Судан откако паравоените Сили за брза поддршка (РСФ) ја презедоа контролата врз западниот судански град Ел Фашер, главен град на регионот Северен Дарфур.

„Бидејќи борците на РСФ контролираат големи делови од Ел Фашер, Судан, ги повикуваме одговорните да престанат со секакво насилство врз цивилите заробени во градот. Убиствата, силувањата и тортурата мора да престанат сега“, соопшти германското Министерство за надворешни работи на американската компанија за социјални медиуми X.

„Раководството на РСФ јавно се обврза да ги заштити цивилите. Тие ќе бидат повикани на одговорност“, се додава во соопштението.

Вчера Министерството повика на итен прекин на огнот, изразувајќи голема загриженост поради зголемениот број цивилни жртви додека РСФ напредуваат во Ел Фашер.

Началникот на суданската армија и претседател на Советот за транзициски суверенитет вчера изјави дека војската одлучила да се повлече од Ел Фашер за да спречи натамошно „систематско уништување и убивање“ на цивили од страна на РСФ.

РСФ го опсадува Ел Фашер од мај 2024 година, а суданската армија се обидуваше да ја пробие опсадата на градот, кој служи како центар за хуманитарни операции за петте држави од Дарфур.

Армијата и РСФ се вклучени во граѓанска војна од април 2023 година, што резултираше со илјадници смртни случаи и милиони раселувања.