Германија смета дека Украина мора да биде на преговарачка маса

БЕРЛИН (АА) - Германија денес објави дека Украина мора да учествува во идните мировни преговори, потврдувајќи ја својата посветеност да го поддржува Киев додека не се постигне праведен мир, известува Анадолу.

Германските и украинските лидери телефонски разговарале за актуелната воена и хуманитарна ситуација во Украина, како и за потенцијалните патишта кон праведен мир во таа земја, се вели во соопштението на портпаролот на канцеларот Олаф Шолц.

„Канцеларот и претседателот Зеленски се согласија дека Украина мора да биде на маса во идните мировни преговори“, рече Штефен Хебестрајт, додавајќи дека „прашањата за европската безбедност мора да се разговараат заедно со Европејците“.

Тој истакна дека канцеларот Шолц и украинскиот претседател Зеленски ќе бидат во тесна координација во наредните денови за да разговараат за идните случувања.

„Украинскиот претседател ѝ се заблагодари на Германија за нејзината континуирана, обемна воена и финансиска поддршка. Канцеларот ја потврди својата постојана и непоколеблива солидарност со Украина“, истакна Хебестрајт.

Шолц го изрази своето уверување дека Германија ќе продолжи да ја поддржува Украина во тесна координација со европските и меѓународните партнери додека не се постигне праведен, сеопфатен и траен мир.