Burak Bir
23 Декември 2025•Ажурирај: 24 Декември 2025
ЛОНДОН (AA) – Шведската климатска активистка Грета Тунберг денес беше приведена за време на протест во Лондон, организиран во поддршка на штрајкувачите со глад поврзани со групата „Палестинска акција“, јавува Анадолу.
Видеото објавено од групата „Затвореници за Палестина“ прикажува како 22-годишната активистка е приведена од полицајци пред канцелариите на осигурителната компанија „Аспен Иншуранс“, за која групата тврди дека обезбедува услуги за израелската компанија за производство на оружје „Елбит Системс“.
Тунберг беше приведена според Законот за тероризам откако држела транспарент со натпис: „Ги поддржувам затворениците од 'Палестинска акција'. Се спротивставувам на геноцид“.
„Таа е приведена поради прикажување предмет (во овој случај транспарент) со кој се изразува поддршка за забранета организација ('Палестинска акција'), што е спротивно на член 13 од Законот за тероризам од 2000 година“, соопшти полицијата на Лондон во објавата на американската платформа за социјални медиуми X.
Неколкумина активисти, исто така, испрскале црвена боја на предниот дел од зградата, пред да бидат приведени.
Протестот се одржа во услови на сè поголеми критики кон британската Влада поради состојбата на шестмина притворени лица поврзани со забранетата група „Палестинска акција“, кои се на штрајк со глад од ноември.
„Палестинска акција“ беше забранета во јули според британскиот Закон за тероризам од 2000 година откако членови на групата влегоа во воздухопловната база „Кралските воздухопловни сили Бриз Нортон“ и оштетија два авиона.
Оттогаш низ Обединетото Кралство беа приведени стотици пропалестински активисти.
