Грчките земјоделци го блокираа сообраќајот за камиони на граничниот премин со Бугарија

Како дел од тековните протести, грчките земјоделци го блокираа сообраќајот за камиони на граничниот премин Промахонас (Кулата) со Бугарија, известува Анадолу.

Според објавените вести, земјоделците што протестираат кај Промахонас го затвориле граничниот премин за сообраќај на камиони, освен за приватни возила. Како резултат на протестот, бројни шлепери и камиони беа принудени да чекаат на границата.

Во регионот Малгара во близина на Солун, со поставената блокада од страна на земјоделците со денови е затворен патот што води кон Атина.

Претставниците на земјоделците утре ќе одржат состанок во Лефконас, во покраината Серез, каде ќе донесат одлука за иднината на протестите.

Земјоделците тврдат дека мерките што ги објави владата не ги компензираат нивните загуби на приходи, наведувајќи дека се недоволни земјоделските субвенции и регулативи на трошоците за гориво.