Abdulbesar Ademi
18 Декември 2025•Ажурирај: 18 Декември 2025
СКОПЈЕ (AA) - По завршувањето на самитот ЕУ-Западен Балкан, одржан во Брисел, во заедничката декларација беше наведено дека денешниот самит претставува „доказ за цврстите темели“ и најдобра можност за повторна потврда на стратешкото партнерство меѓу ЕУ и Западен Балкан, пренесува Анадолу.
Заедничката декларација, која содржи 21 точка, беше усвоена од лидерите на европскиот блок и земјите членки, во консултација со партнерите од Западен Балкан, но без учество на Србија, која, како што се наведува, не се согласила со декларацијата.
„Го потврдуваме нашиот целосен и јасен ангажман кон перспективата на Западен Балкан за членство во ЕУ. Иднината на Западен Балкан е во ЕУ и проширувањето претставува реална можност што треба да се искористи“, се наведува во декларацијата.
Во декларацијата се нагласува дека клучот за градење заедничка иднина се инклузивната регионална соработка, помирување и добрососедски односи, и се осврнува на Северна Македонија за спроведување на меѓународните договори, вклучувајќи го Преспанскиот договор со Грција и Договорот за пријателство и добрососедство со Бугарија.
„Потребни се дополнителни и решителни напори за поттикнување на помирувањето и стабилноста во регионот, како и за изнаоѓање и спроведување конечни, сеопфатни и обврзувачки решенија за регионалните и билатералните спорови и прашања на партнерите, вкоренети во наследството од минатото“, се повикува во декларацијата.
Меѓу прашањата опфатени во заедничката декларација беше истакнат и недостатокот на нормализација на односите меѓу Приштина и Белград, што, како што беше наведено, и понатаму ги „попречува“ двете земји на нивниот пат кон Европа.
„Сите договори постигнати во дијалогот Белград–Приштина, со посредство на ЕУ, мора да се спроведат, особено Договорот за патот кон нормализација и неговиот Анекс. Поддршката во рамките на Инструментот за реформи и раст за Западен Балкан е условена од конструктивниот ангажман на партнерите, со мерлив напредок и опипливи резултати во нормализацијата на нивните односи“, се вели во декларацијата.
Понатаму, во заедничката декларација беше истакната и руската агресија врз Украина и непоколебливата поддршка за Украина, при што проширувањето на блокот беше оценето како геостратешка инвестиција во мир, безбедност и стабилност, како и поддршката на ЕУ за Западен Балкан во справувањето со кибер, хибридни закани и странски мешања.
Исто така беше соопштено дека Планот за раст се очекува да го забрза економскиот развој, со до 6 милијарди евра за реформи и инвестиции во Западен Балкан, а беше нагласено и дека управувањето со миграцијата, според заклучоците од самитот, „останува заеднички предизвик“ и бара „усогласување на визните политики и зајакнување на граничната контрола“.
„Ја нагласуваме важноста на континуираните заеднички напори во стратешката комуникација, вклучително и придобивките од проширувањето и постепената интеграција, како и потребата од градење доверба, меѓусебно разбирање и општествен консензус“, се наведува во заклучокот на заедничката декларација.
Следниот самит меѓу ЕУ и Западен Балкан ќе се одржи во јуни 2026 година во Црна Гора.
