Две лица убиени, едно повредено во израелски напад со дрон во Јужен Либан

Според официјалните медиуми, денес се убиени две лица, а едно е повредено во напади со израелски дрон врз два мотоцикла во град во Јужен Либан, пренесува Анадолу.

Првиот напад се случил во Кунине во округот Бинт Џбеил, објави либанската Национална новинска агенција (ННА).

Израелската армија соопшти дека го убила Ибрахим Мухамед Раслан, офицер на Хезболах задолжен за одржување, во подрачјето на Кунине во Јужен Либан.

Во врска со вториот напад, агенцијата соопшти дека едно лице е убиено во израелски воздушен напад насочен кон мотоцикл на патниот правец Набатија-Шукин во покраината Набатија во Јужен Либан.

Новинската агенција вчера соопшти дека три лица се повредени во серија израелски воздушни напади врз пограничниот град Шеба и округот Тир во Јужен Либан.

Израелската армија уби повеќе од 4.000 луѓе, а повреди речиси 17.000 во нападите врз Либан, кои започнаа во октомври 2023 година и се претворија во целосна офанзива во септември 2024 година.

Прекин на огнот меѓу Хезболах и Израел беше постигнат во ноември 2024 година. Израелската армија требаше да се повлече од Јужен Либан во јануари, но тоа го направи само делумно и продолжува да има воено присуство на пет гранични пункта.