Rabia İclal Turan
31 Октомври 2025•Ажурирај: 01 Ноември 2025
Американскиот претседател Доналд Трамп денес ги негираше медиумските извештаи дека нападите врз воените инсталации во Венецуела можно е да се неизбежни, велејќи им на новинарите дека не донел одлука за ова прашање, јавува Анадолу.
„Не, не е вистина“, рече Трамп во авионот „Ер Форс Ван“ кога го прашаа дали размислува за напади врз Венецуела.
Неколку американски медиуми објавија дека администрацијата на Трамп одлучила да изврши напади врз воени инсталации во Венецуела како дел од наводната војна против „наркотероризмот“ и дека нападите би можеле да се случат во секој момент.
Претходно денес „Мајами Хералд“ објави дека планираните напади - за кои претходно објави „Волстрит џурнал“ - имаат цел да уништат воени инсталации што ги користи „Картел де лос Солес“, мрежа за трговија со дрога што САД ја обвинува за шверц на кокаин во земјата, и да ги прекинат правците за шверц низ кои американските власти велат дека се префрлаат околу 500 тони кокаин годишно.
Вашингтон го обвини венецуелскиот претседател Николас Мадуро дека го предводи „Картел де лос Солес“, криминална група со седиште во јужноамериканската земја. Во јули 2025 година Вашингтон ја означи како „терористичка“ организација.
Извори за „Хералд“ изјавија дека целите би можеле да бидат гаѓани од воздух во рок од „неколку дена или дури часови“, а Вашингтон ја удвои наградата за информации за претседателот на Венецуела, Николас Мадуро, на 50 милиони долари и нуди 25 милиони долари за клучни поручници, како што е министерот за внатрешни работи Диосдадо Кабело.
„Мадуро е на праг да се најде заробен и наскоро би можел да открие дека не може да избега од земјата дури и да се реши на тоа“, истакна извор цитиран од весник со седиште на Флорида. „Она што е полошо за него, сега има повеќе од еден генерал што е подготвен да го фати и предаде, целосно свесен дека едно е да се зборува за смртта, а друго да се очекува дека доаѓа.“
Од почетокот на септември се извршени најмалку 14 напади, главно во Карипското Море и Тихиот Океан, при што се убиени повеќе од 61 лице.
Групите за човекови права и правните експерти ја доведоа во прашање легитимноста на операциите, тврдејќи дека американските напади врз наводни бродови за дрога го кршат меѓународното право.
Шефот на ОН за човекови права, Волкер Турк, ги нарече нападите „неприфатливи“ и побара независна истрага, а неговата канцеларија ги означи како вонсудски убиства.
Мадуро го обвини Вашингтон за „измислување“ војна против неговата земја, нарекувајќи ги обвинувањата на САД „вулгарни“ и „тотално лажни“. Тој инсистира дека Венецуела „не произведува листови од кокаин“ и рече дека движењата на американската војска во близина на нејзиниот брег сигнализираат планови за „нова, вечна војна“.
