Експерт за безбедност роден во Турција, ќе биде назначен за претседател на Федералната канцеларија за заштита на Уставот

БЕРЛИН (АА) - Германија ќе го назначи Синан Селен за нов претседател на Федералната канцеларија за заштита на Уставот (БфВ), со што тој ќе стане прв човек со имигрантско потекло што ќе предводи една од највисоките безбедносни институции во земјата, јавува Анадолу.

Според германскиот јавен сервис АРД, министерот за внатрешни работи Александер Добриндт треба да го објави именувањето денес, а сојузната Влада најверојатно ќе ја формализира одлуката во среда.

Селен, кој има 53 години, е роден во Истанбул, а со семејството се преселил во Германија кога имал четири години. Како експерт за антитероризам, тој од јануари 2019 година ја извршува функцијата потпретседател на БфВ и познат е по стручноста за меѓународен тероризам и верски екстремизам.

По завршувањето на студиите по право на Универзитетот во Келн, Селен ја започнал кариерата во областа на безбедноста во 2000 година во Сојузната криминалистичка служба (БКА).

Од 2006 до 2009 година го водел Одделот за странски тероризам и странски екстремизам во Сојузното министерство за внатрешни работи, пред да премине во БфВ.

Селен ќе го наследи Томас Халденванг, кој во ноември 2024 година поднесе оставка за да се кандидира за пратеничко место во редовите на Христијанско-демократската унија (ЦДУ) на канцеларот Фридрих Мерц.

Неговите политички амбиции, сепак, завршија без успех бидејќи не успеа да освои мандат на општите избори што се одржаа во февруари.