ИСЛАМАБАД (АА) - Имран Кан, притворениот поранешен премиер на Пакистан, е номиниран за Нобеловата награда за мир за неговиот придонес за човековите права и демократијата за време на неговото владеење во земјата, известува Анадолу.

Номинацијата е објавена ова утро од членовите на Пакистанската светска алијанса (PWA), застапничка група формирана минатиот декември, која дејствува во норвешката политичка партија Партиет Сентрум.

„Задоволство ни е да објавиме во име на Партиет Сентрум дека во соработка со PWA го номиниравме г-дин Имран Кан, поранешен премиер на Пакистан, за Нобеловата награда за мир за неговата работа на човековите права и демократијата во Пакистан“, објави партијата Партиет Сентрум на социјалната мрежа X.

И во 2019 година, Кан беше номиниран и за Нобеловата награда за мир за неговите напори во промовирањето на мирот во Јужна Азија.

Секоја година, Норвешкиот Нобелов комитет добива стотици номинации, по што го избира добитникот преку долготраен процес од осум месеци.

Кан, основачот на главната пакистанска опозициска партија Пакистанско движење за правда, е во затвор од август 2023 година. Овој јануари тој беше осуден на 14 години затвор под обвинение за злоупотреба на моќта и за корупција.

Тоа беше четврти голем случај во кој поранешниот премиер беше осуден. Судовите укинаа или суспендираа три претходни пресуди поврзани со продажба на владини подароци, откривање државни тајни и незаконски брак.

Кан ја загуби власта по гласањето за недоверба во парламентот во април 2022 година. Тој ги негира сите обвинувања, нарекувајќи ги монтирани политички случаи.