Зеленски: Сигналите што ги слушаме од преговарачката платформа може да се наречат позитивни

АНКАРА (АА) - Украинскиот претседател Владимир Зеленски денеска изјави дека последната рунда мировни преговори со Русија во Истанбул, Турција, може да се нарече „позитивна“, но дека непријателот сѐ уште е на територијата на Украина, пренесува Агенција Анадолија (АА).

„Сигналите што ги слушаме од преговарачката платформа може да се наречат позитивни“, рече Зеленски на неговиот профил на Телеграм.

„Но овие сигнали не ги потиснуваат пукнатините на руските гранати“, додаде тој.

Истакнувајќи дека ги гледаат сите ризици и дека нема причина да им веруваат на зборовите на одредени претставници на држава која продолжува да се бори за нивно уништување, претседателот рече: „Украинците не се наивни луѓе. Украинците веќе научија во текот на овие 34 дена на инвазијата и во изминатите осум години од војната во Донбас дека може да се верува само на конкретен резултат.“

Новата рунда разговори во Истанбул траеше три часа, а руските и украинските преговарачи подоцна одржаа одделни брифинзи за печатот за да го информираат светот за исходот.

Додека Украина повика неколку земји, вклучително и Турција, да бидат гаранти во евентуалниот иден мировен договор, Русија најави дека значително ќе ги намали воените активности во насока на украинските градови Киев и Чернихив за да ја зголеми довербата за идните преговори.

Русија испрати војници во Украина, во, како што ја нарече, „специјалната воена операција“ на 24 февруари. Војната беше дочекана со меѓународен бес, а западните земји воведоа строги финансиски санкции кон Москва.

Најмалку 1.179 цивили се убиени во Украина, а 1.860 се повредени, според проценките на ОН, кои истакнаа дека вистинската бројка е веројатно многу поголема.

Повеќе од 3,9 милиони Украинци, исто така, пребегнале во неколку европски земји, а милиони се раселени во земјата, според Агенцијата за бегалци на ОН.