Зеленски: „Украина е подготвена да преговара со Русија“

БРИСЕЛ (АА) - Украинскиот претседател, Владимир Зеленски, изјави дека Украина сè уште настојува да биде членка на НАТО и Европската Унија (ЕУ) и дека земјата е подготвена да преговара со Русија, јавува Anadolu Agency (AA).

Тој ги даде овие изјави на заедничката прес-конференција со генералниот секретар на НАТО, Јенс Столтенберг, во Брисел, што претставува прва официјална посета на украинскиот претседател во странство по преземањето на претседателската функција.

„Стратешкиот курс на Украина за постигнување полноправно членство во ЕУ и НАТО... останува непроменет“, рече Зеленски. „Ова е приоритет на нашата надворешна политика“.

„Ние сме подготвени да преговараме со Русија. Подготвени сме да ги имплементираме договорите од Минск. Сепак, прво треба да бидеме во можност да се заштитиме себеси и да станеме посилни во економска, политичка и воена смисла“, додаде тој.

Столтенберг, од своја страна, се осврна на Украина како на високо значаен партнер и ѝ се заблагодари на земјата за нејзиниот придонес во операциите на НАТО во Авганистан и Косово.

„Сојузниците не го признаваат и нема да го признаат руското нелегално анектирање на Крим. Ги осудуваме агресивните акции на Русија во Црноморскиот Регион“, додаде тој.

Источните региони на Украина, од март 2014 година, се зафатени од конфликт, по руското анектирање на Крим.

Најголемите земји членки на Европската Унија (ЕУ), Германија и Франција, беа земји гаранти на договорот за прекин на огнот во Минск, во февруари 2015.

Според податоците на Обединетите нации (ОН), околу 13.000 луѓе се убиени во конфликтот од 2014 година.