Изминатиов јануари го собори рекордот како најтопол јануари на глобално ниво

СУШ (АА) – Јануари 2025 година е забележан како најтопол јануари глобално, поставувајќи нов рекорд на температури во услови на зголемена загриженост за климатските промени и нивното влијание врз планетата, јавува Анадолу.

Според податоците од Европската климатска служба „Коперник“, просечната температура на копното во Европа во јануари 2025 година изнесувала 1,80 °C, што е 2,51 °C над просекот за јануари во периодот од 1991 до 2020 година.

Ова е втор најтопол јануари во историјата, по јануари 2020 година, кога температурите беа 2,64 °C над просекот.

Надвор од Европа, температурите најмногу отстапувале од просекот во Североисточна и Северозападна Канада, Алјаска и Сибир. Високи температури биле забележани и во Јужна Америка, Африка, голем дел од Австралија и на Антарктикот.

Од друга страна, најниски температури под просекот биле забележани во САД и источните региони на Русија, Чукотка и Камчатка. Потпросечни температури имало и на Арапскиот Полуостров и копнена Југоисточна Азија.

Саманта Бурџис, заменик-директорката на Службата за климатски промени „Коперник“, изјави:

„Јануари 2025 година е уште еден изненадувачки месец, продолжувајќи го трендот на рекордно високи температури во последните две години и покрај развојот на Ла Ниња во тропскиот Пацифик, кои обично имаат привремен ефект на ладење врз глобалните температури. ‘Коперник’ ќе продолжи внимателно да ги следи температурите на океаните и нивното влијание врз нашата променлива клима во текот на 2025 година.“