Израел: Претседателот Херцог го повика премиерот Нетанјаху да ги запре судските реформи

ТЕЛ АВИВ (АА) - Израелскиот претседател Исак Херцог денес го повика премиерот Бенјамин Нетанјаху веднаш да го запре законодавниот процес за реформи во правосудството по синоќешните масовни протести, јавува Анадолу.

Обраќајќи им се на премиерот, Владата и членовите на коалицијата на Твитер, Херцог рече:

„Вечерва видовме многу тешки сцени. Им се обраќам на премиерот, на Владата и на членовите на коалицијата: Емоциите се тешки и болни. Длабока вознемиреност ги обзема луѓето. Безбедноста, економијата, општеството, сè е загрозено. Очите на израелскиот народ се свртени кон вас.“

„Заради единството на народот на Израел, заради одговорност, ве повикувам веднаш да го прекинете законодавниот процес. Се обраќам до сите партиски лидери во Кнесетот, коалицијата и опозицијата како едно, ставете ги граѓаните на нацијата пред сè друго и однесувајте се одговорно и храбро без дополнително одлагање.“

Во изминатите 12 недели во Израел се случија масовни протести против плановите на Владата за судски реформи, кои опозицијата ги смета за грабање на власта во корист на извршната власт.

Нетанјаху одлучи да го отпушти министерот за одбрана, Галант, во неделата, откако Галант го повика израелскиот лидер претходниот ден да го паузира владиниот план и да го запре законодавниот процес за реформи.

Нетанјаху, кому му се суди за корупција, тврди дека неговиот план ќе ја подобри демократијата и ќе ја врати рамнотежата меѓу законодавната, извршната и судската власт.