Abdel Ra'ouf D. A. R. Arnaout
10 Април 2023•Ажурирај: 11 Април 2023
ЕРУСАЛИМ/КУДС (АА) - Израел денес објави договор од речиси 400 милиони долари за снабдување на Грција со наведувани противтенковски ракети, пренесува Анадолу.
Преку соопштение, израелското Министерство за одбрана објави дека ќе ѝ обезбеди на Грција од ракетите „Спајк“, во производство на државната компанија Напредни одбранбени системи Рафаел.
Во соопштението, исто така, се наведува дека договорот е потпишан меѓу генералниот директор на израелското Министерство за одбрана, генерал-мајор Ејал Замир и грчкиот директор за инвестиции во одбраната и вооружување, Аристејдис Алексопулос.
„Овој проект се приклучува на серијата договори меѓу државата Израел и Република Грција и дополнително го нагласува силното партнерство помеѓу нашите земји и нашите одбранбени естаблишменти, како и нашата заедничка посветеност за обезбедување регионална стабилност“, се нагласува во соопштението.
Од израелското Министерство се додава дека наведуваните ракети можат да бидат лансирани од копно, море и воздух и дека се користени од страна на 40 земји низ светот, меѓу кои и 19 земји членки на ЕУ и НАТО-сојузници.
На 29 март Грција го одобри купувањето на израелските ракетни системи за време на состанокот на Националниот совет за безбедност со кој претседаваше премиерот Киријакос Мицотакис.
Грција неодамна потпиша повеќе големи договори за оружје, меѓу кои и за беспилотни летала од Израел, авиони Рафал од Франција и надградба на нејзината флота авиони Ф-16 од САД.
Атина, исто така, му пристапи на Вашингтон за потенцијално купување на најмалку 20 стелт авиони Ф-35 и на Берлин за надградба на нејзината флота тенкови Леопард 2 и купување оклопни возила Линикс.
