Rabia İclal Turan
06 Декември 2023•Ажурирај: 07 Декември 2023
ИСТАНБУЛ (АА) - Израел денес објави дека одлучил да ѝ ја укине визата за престој на хуманитарната координаторка на Обединетите нации (ОН), Лин Хестингс, поради нејзиниот став во врска со нападот на палестинската група на отпорот Хамас на 7 октомври, јавува Анадолу.
„Некој кој не го осудува Хамас за бруталниот масакр на 1.200 Израелци, за киднапирање на бебиња и постари лица, како и за ужасните акти на злоупотреба, силување и користење на жителите на Газа како жив штит, туку го осудува Израел, демократска земја која ги штити своите граѓани, не може да служи во ОН и не може да влезе во Израел!“, изјави израелскиот министер за надворешни работи Ели Коен на социјалната мрежа X, обвинувајќи ги ОН за пристрасност.
Овој потег е направен во време на зголемени критики од ОН поради израелската војна против Газа, во која загинаа над 16.000 Палестинци.
Ваквиот потег е извршен и откако Хестингс во изјавата во понеделникот рече дека не постојат услови потребни за испорака на помош до жителите на Газа.
„Доколку е можно, ќе се развие уште попеколно сценарио, во кое хуманитарните операции можеби нема да можат да одговорат“, рече таа во изјавата.
„Никаде не е безбедно во Газа и нема каде да се оди“, додаде таа.
Израел ја продолжи својата воена офанзива во петокот на палестинската територија по завршувањето на еднонеделната хуманитарна пауза со Хамас.
Најмалку 16.248 Палестинци загинаа, а над 43.616 се ранети во немилосрдните воздушни и копнени напади врз енклавата од 7 октомври по прекуграничниот напад на Хамас.
Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.
„Ханибалова директива“ или „Ханибаловиот протокол“ е контроверзна процедура што ја користат израелските одбранбени сили (IDF) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.
