Израелската Армија приведе уште 60 Палестинци во Западниот Брег

РАМАЛА (АА) - Израелската Армија денес приведе 60 Палестинци од различни области низ окупираниот Западен Брег и окупираниот Источен Кудс (Ерусалим), пренесува Анадолу.

Невладината организација „Палестинско здружение на затвореници“ соопшти дека со новите апсења бројот на Палестинци кои биле приведени од израелските сили од 7 октомври наваму се зголемил на 1.740.

Пред 7 октомври, бројот на Палестинците притворени во израелските затвори беше околу 5.200, вклучително и повеќе од 1.000 затворени според озлогласената политика на административен притвор без обвинение или судење.

Тензиите се високи низ Западниот Брег откако избувнаа новите борби на почетокот на овој месец меѓу палестинските групи и Израел во Газа.

Околу 120 Палестинци се убиени од страна на израелските сили на Западниот Брег од 7 октомври, покрај повеќе од 2.000 повредени, според палестинското Министерство за здравство.