Израелски медиуми: Катар му пренесе на Израел дека Хамас ги прекинува преговорите за размена на заробеници

ИСТАНБУЛ (АА) - Катар му соопшти на Израел дека палестинската група Хамас ги прекинала преговорите за договор за размена на заробеници, јавуваат израелските медиуми денес, пренесува Анадолу.

„Хамас им пренесе на катарските посредници дека бара целосно повлекување на израелската војска од Појасот Газа и прекин на војната во првата фаза од каков било договор за размена на заробеници“, соопшти израелската јавна телевизија КАН, цитирајќи извор запознаен со разговорите.

Засега нема коментар од Катар во врска со оваа вест.

Се верува дека Хамас држи речиси 136 заложници по неговиот прекуграничен напад во Израел на 7 октомври.

Палестинската група на отпорот бара прекин на смртоносната офанзива на Израел врз Појасот Газа за каков било договор за размена на заробеници со Израел.

Израелската Влада ги отфрли повиците за прекин на војната во Газа до уништување на Хамас и ослободување на заложниците.

Израел започна смртоносна офанзива на Појасот Газа од 7 октомври, при што загинаа најмалку 25.700 Палестинци, а беа повредени 63.740 други, додека се верува дека речиси 1.200 лица загинале во Израел.

Како последица на војната на Израел, 85 отсто од населението на Газа е внатрешно раселено поради акутен недостиг на храна, чиста вода и лекови, додека повеќе од половина од инфраструктурата на енклавата е оштетена или уништена, според ОН.