Израелскиот премиер повторно на судење за корупција по едномесечна пауза

ЕРУСАЛИМ / ИСТАНБУЛ (AA) – Израелскиот премиер Бенјамин Нетанјаху денес се појави пред Окружниот суд во Тел Авив за да сведочи во рамките на неговото судење за корупција, по едномесечен прекин, јавија локални медиуми, пренесува Анадолу.

Судењето беше прекинато поради еврејските празници и патувањето на Нетанјаху во Њујорк, каде што учествуваше на 80. сесија на Генералното собрание на Обединетите нации.

Според израелскиот јавен радиодифузер КАН, министрите и пратениците од партијата на Нетанјаху, Ликуд, присуствуваа на судењето за да му дадат поддршка на премиерот.

Нетанјаху накратко ја напуштил судницата откако добил плик од еден од своите соработници, пренесе медиумот.

Во понеделникот, американскиот претседател Доналд Трамп се обрати во израелскиот Кнесет, повикувајќи го израелскиот колега Исак Херцог да го помилува Нетанјаху во врска со неговото судење за корупција.

Според израелскиот закон, претседателот има овластување да помилува осудени лица или да им ја намали казната врз основа на информации или мислења од надлежните органи, како што се министрите за правда или одбрана.

Министерот за правда Јарив Левин, исто така од партијата Ликуд, денес изрази поддршка за помилување на премиерот, наведувајќи дека судењето „никогаш не требало да започне“ и дека неговото постоење е „спротивно на правдата и интересите на државата“.

Министерот за образование Јоав Киш, исто така член на Ликуд, на платформата на американската компанија за социјални медиуми X повика на укинување на судењето, наведувајќи дека Израел се соочува со „сериозни безбедносни предизвици и егзистенцијални закани“.

Во јануари, Нетанјаху започна со испрашувања во рамките на случаите 1000, 2000 и 4000, кои тој целосно ги негира.

Случајот 1000 се однесува на обвинувања дека Нетанјаху и неговото семејство примиле скапи подароци од богати бизнисмени во замена за услуги.

Случајот 2000 опфаќа наводни преговори со издавачот на весникот Једиот ахронот, Арнон Мозес, со цел да обезбеди позитивно медиумско покривање.

Случајот 4000, кој се смета за најсериозен, се однесува на олеснувања дадени на Шаул Елович, поранешен сопственик на новинскиот портал Вала и телекомуникациската компанија Безек, во замена за поволни медиумски текстови.

Судењето на Нетанјаху започна на 24 мај 2020 година, а тој е првиот актуелен израелски лидер кој сведочи како обвинет за кривично дело во историјата на земјата.

Дополнително, тој се соочува со обвиненија за воени злосторства и злосторства против човештвото, откако Меѓународниот кривичен суд во ноември 2024 година издаде налог за апсење за него и поранешниот министер за одбрана Јоав Галант, поради злосторствата извршени во Газа, каде од октомври 2023 година досега се убиени речиси 68.000 луѓе, најмногу жени и деца.