Илјадници без електрична енергија една недела по силното невреме што ја погоди Литванија

Околу 17.000 корисници и натаму се без електрична енергија денес, по една недела откако силно невреме ја зафати Литванија, објави радиодифузерот ЛРТ, јавува Анадолу.

„Од утрово сè уште имаме 17.000 корисници, поточно објекти, каде што снабдувањето со електрична енергија не е обновено“, изјави директорот на националниот оператор за дистрибуција на електрична енергија.

Директорот на ЕСО, Реналдас Радвила, потврди дека вкупниот број изнесува 17.000, иако некои од објектите трошат многу малку или воопшто не трошат електрична енергија.

Операторот го обнови снабдувањето со електрична енергија за околу 90 отсто од погодените корисници, откако невремето на 22 август во својот најсилен интензитет остави повеќе од 268.000 корисници без електрична енергија.

Според наводите, ЕСО првично очекувал сите прекини да бидат отстранети до саботата, но целосното обновување на снабдувањето сега не се очекува пред 3 септември.

Во силното невреме загина едно лице, а четворица други беа повредени.

Литванската Влада во средата прогласи вонредна состојба на национално ниво поради невремето и големата материјална штета што беше предизвикана.