Syed Zafar Mahdi
15 Јануари 2026•Ажурирај: 15 Јануари 2026
ТЕХЕРАН (АА) – Иранскиот министер за надворешни работи Абас Арагчи ги повика Обединетите нации и неговите странски колеги да го осудат, како што го нарече, „странското мешање“ во антивладините протести што ја погодија земјата, јавува Анадолу.
Во писмото упатено до генералниот секретар на ОН, Антонио Гутереш, високиот комесар за човекови права Фолкер Турк, како и до министрите за надворешни работи на повеќе држави, Арагчи ги опиша протестите во Иран како „терористички, насилни и со карактеристики слични на ДЕАШ“.
Тој наведе дека протестите, кои започнаа на 28 декември поради економските проблеми, биле „злоупотребени од терористичките елементи што ги претвориле мирните демонстрации во вооружени немири“.
„Има случаи на обезглавувања, палење живи луѓе, брутални напади врз припадници на безбедносните сили и обични граѓани, широка употреба на различно огнено оружје, како и палење и целосно уништување на голем број амбулантни и противпожарни возила, медицински центри, како и станбени, јавни и верски објекти“, напиша Арагчи во писмото.
Според него, ваквото однесување укажува дека мирните протести биле задушени од терористите што очигледно биле однапред обучени за вакви насилни дејства“.
Првично протестите избувнаа кон крајот на минатиот месец во Техеран, а потоа се проширија и во други градови.
Иран ги обвини САД и Израел дека ги поддржуваат „бунтовниците“, а иранското судство најави дека нема да покаже „никаква толеранција“ кон оние што се вклучени во насилството.
Арагчи изјави дека за време на протестите биле убиени или повредени „значителен број“ припадници на безбедносните сили, додавајќи дека тоа „ги покажува воздржаноста на органите на редот и екстремното насилство извршено од терористите“.
Изјавите на САД во врска со протестите тој ги оцени како „неодговорни и провокативни“.
„Нивното отворено непочитување на меѓународното право и повторените закани за употреба на сила претставуваат сериозно кршење на принципите на меѓународното право и Повелбата на ОН, кои забрануваат поттикнување тероризам, охрабрување насилство и мешање во внатрешните работи на други држави“, истакна Арагчи.
„Експлицитното признание на поранешен државен секретар на САД дека агенти на Мосад од израелскиот режим се меѓу бунтовниците е јасен пример за вмешаноста на Израел во терористичкото насилство“, рече тој, осврнувајќи се на Мајк Помпео.
„Срамната злоупотреба на мирните протести за политички цели и загрозувањето на животите на иранските граѓани од страна на американски функционери е целосно во согласност со пристапот што го презедоа САД преку воведување економски санкции, кои го нарушуваат правото на живот и економски развој и доведоа до сегашната состојба“, додаде тој, оценувајќи ги тврдењата на САД за поддршка на човековите права во Иран како „лицемерни“.
Арагчи нагласи дека иранската Влада е „целосно свесна за своите обврски во однос на човековите права“ и дека ги презела „сите неопходни мерки за максимална воздржаност“, истовремено исполнувајќи ја својата должност за заштита на граѓаните, јавниот ред и националната безбедност.
Тензиите меѓу Иран и САД се зголемија по избувнувањето на протестите, а извештаите наведуваат дека американскиот претседател Доналд Трамп разгледува можности за воена интервенција во земјата.
Иранските власти соопштија дека се отворени за преговори со Вашингтон, но и дека се подготвени доколку САД се одлучат за воена акција.
Иранските власти сè уште немаат објавено официјални податоци за бројот на жртви или приведени лица. Според Новинската агенција за човекови права (ХРАНА), група за човекови права со седиште во САД, во немирите загинале над 2.600 лица, вклучително и демонстранти и припадници на безбедносните сили.
