Колумбија откри дека Колумбијците осомничени за атентат врз претседателот на Хаити може да се поранешни војници

БОГОТА (АА) - Колумбија соопшти дека Колумбијците приведени за наводен атентат врз претседателот на Хаити, Жовенел Моиз, може да се поранешни војници, пренесува Агенција Анадолија (АА).

Министерот за одбрана на Колумбија, Диего Молано, на прес-конференција се осврна на Колумбијците приведени од полицијата на Хаити осомничени за вмешаност во убиството на Моиз.

Наведувајќи дека Владата на Хаити побарала информации за притворените Колумбијци, Молано рече: „Интерпол денеска официјално побара информации од колумбиската Влада и нашата национална полиција за наводните извршители на атентатот врз претседателот на Хаити, Жовенел Моиз.“

Молано истакна дека на Армијата и полицијата веднаш им се дадени неопходните упатства за да се разјаснат наводите: „Првите детали покажуваат дека поранешните припадници на Националната армија се меѓу одговорните за инцидентот.“

Од друга страна, телевизискиот канал на Хаити, „Караибес“ сподели снимки на осомничени приведени од страна на полицијата, оружје и голем број пасоши.

- Меѓу осомничените за атентат приведени се 15 колумбиски и двајца американски државјани -

Соопштено е дека 15 Колумбијци и двајца Американци се приведени во акцијата против осомничените кои наводно го убиле претседателот Моиз.

Директорот на Националната полиција, Леон Чарлс, рече дека атентатот врз Моиз го извршила единица на командоси, во која имало вкупно 26 Колумбијци и двајца американски државјани со потекло од Хаити.

Бројот на осомничени убиени во рамките на операциите се зголеми на 10.

Педесет и тригодишниот претседател на Хаити, Моиз, е убиен во напад врз неговиот дом од страна на група вооружени лица, а неговата сопруга Мартина Моиз е повредена.

Премиерот Клод Жозеф прогласи вонредна состојба во земјата по убиството на Моиз.