БЕЈРУТ (АА) - Бројот на убиени по израелските воздушни напади во центарот на Бејрут рано утрово се искачи на 11 лица, додека 23 се повредени, соопшти Либанската служба за цивилна одбрана, јавува Анадолу.

Телата на најмалку 11 убиени во нападот во населбата Баста се извлечени од под урнатините, истакна Цивилната одбрана, и додаде дека 23 лица се извлечени живи.

Новообјавените бројки дојдоа откако либанското Министерство за здравство набргу по нападот објави дека четири лица „се убиени, а 23 се повредени во воздушен напад на израелскиот непријател врз подрачјето на Баста во Бејрут“.

Државната Либанска национална новинска агенција објави дека во нападот целосно е уништена станбена зграда на улицата Ал-Мамун во подрачјето.

Спасувачките тимови и брзата помош работат на извлекување на телата и пружање помош на преживеаните среде урнатините. Неколкумина од повредените се префрлени во блиските болници, каде некои се во критична состојба.

Израел започна прекугранична војна со Либан, со воздушната кампања кон крајот на септември против, како што тврди, позиции на Хезболах.

Според либанските здравствени власти, во израелските напади врз Либан од октомври минатата година убиени се над 3.600 луѓе, над 15.300 се повредени, додека над 1 милион се раселени.

Тел Авив го прошири конфликтот со започнување копнен упад во јужен Либан на 1 октомври.