Либискиот министер за внатрешни работи избегна обид за атентат

ТРИПОЛИ

Либискиот министер за внатрешни работи, Фати Башага, вчера избегна обид за атентат, соопшти Министерството, јавува Агенција Анадолија (АА).

Министерството за внатрешни работи соопшти дека врз Башага и неговиот конвој бил отворен оган со митралези од пикап-возила наполнети со тешко оружје.

„Башага го избегна нападот неповреден и е во добра состојба“, се соопштува од Министерството.

„Едно лице од обезбедувањето на Башага е повредено за време на нападот, додека еден од напаѓачите е неутрализиран, а двајца се уапсени“, се додава од Министерството.

Ривалските политички групи на Либија на 5 февруари се договорија за време на разговорите со посредство на Обединетите нации (ОН) во Женева да формираат привремена влада на единство, што ќе ја води земјата на избори во декември.