Нов Зеланд ќе ја финализира својата позиција за Палестина

Министерот за надворешни работи на Нов Зеланд, Винстон Питерс, денес изјави дека неговата земја следната недела ќе ја финализира својата позиција за државноста на Палестина за време на ангажманите во Њујорк, јавува Анадолу.

Питерс викендов ќе отпатува за Њујорк за да присуствува на 80. сесија на Генералното собрание на Обединетите нации.

Таму тој ќе учествува на конференцијата за решение за две држави на 22 септември, на која копретседаваат Франција и Саудиска Арабија, а на која францускиот претседател Емануел Макрон и неколку други лидери ветија дека формално ќе ја признаат палестинската држава.

„Големите конфликти - вклучително и во Украина, Газа, Јужен Судан и Мјанмар - се наѕираат како дел од средбата на светските лидери во Њујорк следната недела. Нашето време во Њујорк ќе биде идеална можност да собереме информации за тоа како широк спектар партнери ги гледаат и се справуваат со предизвиците со кои се соочува светот - за да помогнеме во информирањето на нашите сопствени политички позиции за голем број прашања“, рече тој.

„Ова го вклучува и комплексното прашање за признавањето на Палестина, кон кое Нов Зеланд пристапува внимателно и промислено со месеци. Ангажманите следната недела ќе ни помогнат да ја финализираме нашата позиција по ова важно прашање, врз основа на најновите достапни информации“, додаде Питерс.

Минатиот месец, Питерс рече дека Велингтон размислува за признавање на палестинската држава и ќе донесе одлука во текот на следниот месец.

Австралискиот премиер Ентони Албанезе во август објави дека Австралија ќе ја признае Палестина на Генералното собрание на ОН за да придонесе за меѓународен импулс кон решение за израелско-палестинскиот конфликт со формирање на две држави.

Франција, Велика Британија и Канада, исто така, ја објавија својата намера да ја признаат Палестина на состанокот, придружувајќи се на мнозинството земји членки на ОН кои веќе го сторија тоа.