Обилните дождови и силниот ветер предизвикаа поплави и свлечишта во Јапонија

ТОКИО

По обилните дождови и силните ветрови во Јапонија, илјадници луѓе беа предупредени да се евакуираат, а железничкиот сообраќај е запрен, пренесува Агенција Анадолија (АА).

Јапонската метеоролошка агенција (ЈМА) издаде предупредувања за свлечиште во провинциите Хокаидо, Аомори, Ивате и Гифу, каде што обилните врнежи продолжуваат.

Јапонската метеоролошка агенција соопшти дека брзината на ветерот ќе достигне 90 километри на час во Хокаидо и 80 километри на час во Тохоку и Хокурику.

Јавниот дифузер НХК (NHK) соопшти дека се издадени предупредувања за евакуација на 2.405 лица во Ивате, 8.399 во Аомори и на 1.204 лица во Хокаидо.

Јапонските источни железници, исто така, информираа дека некои железнички услуги на фреквентната линија Токаидо се прекинати.