Gizem Nisa Çebi Demir
01 Јануари 2026•Ажурирај: 02 Јануари 2026
ИСТАНБУЛ (АА) - Околу 520.000 луѓе почнаа да се собираат рано утрово, на првиот ден од Новата година, на мостот Галата во Истанбул, Турција, на марш во поддршка на Палестина, организиран од Алијансата за хуманост и Платформата за национална волја, јавува Анадолу.
Одбележувајќи го првото утро од 2026 година, демонстрантите се собраа со учество на околу 400 организации на граѓанското општество под слоганот „Нема да се плашиме, нема да молчиме, нема да ја заборавиме Палестина“, барајќи крај на геноцидот во Палестина.
Пред настанот, граѓаните се собраа пред утринската молитва во неколку големи џамии низ Истанбул, меѓу кои Големата џамија „Аја Софија“, „Султанахмет“, „Фатих“, „Сулејманије“ и Новата џамија „Еминону“.
Демонстрантите држеа турски и палестински знамиња додека се собираа во дворовите на џамиите во знак на солидарност со Палестина.
И покрај студеното време, одѕивот беше голем. Беа преземени обемни безбедносни мерки, особено на плоштадот „Султанахмет“, каде што на учесниците им беа понудени и топли пијалоци.
По утринската молитва, демонстрантите тргнаа пеш кон Мостот Галата, придружувани од неколку министри, високи претстравници и личности наведени во официјалниот протокол.
Настанот започна во 8:30 часот по локално време на Мостот Галата.
Голем транспарент со сликата „Ханзала“, создадена од покојниот палестински карикатурист Наџи ал-Али и тесно поврзана со палестинската кауза, беше закачен на зградата зад главната прес-платформа.
На програмата беа изведени дела од меѓународно познати уметници и музичари, вклучувајќи го либанско-шведскиот пејач Махер Заин, турскиот уметник Есат Кабакли и бендот Груп Јурујус.
Вчера, заедничка платформа на групи на граѓанското општество одржа прес-конференција во седиштето на Турската младинска фондација (ТУГВА).
За време на брифингот, претседателите на турските спортски клубови Бешикташ, Галатасарај и Трабзонспор, заедно со членот на одборот на Фенербахче, Ертан Торуноѓулари, јавно ја изразија својата поддршка за маршот.
Неколку други спортски клубови, исто така, упатија повици охрабрувајќи учество на маршот.
Зборувајќи на прес-конференцијата, Билал Ердоган, претседател на Одборот на доверители на Фондацијата Илим Јајма и член на Високиот советодавен одбор на ТУГВА, рече дека „повеќе од 70.000 цивили и најмалку 20.000 деца се убиени во геноцидот во Газа од октомври 2023 година“.
Според Министерството за здравство на Газа, најмалку 414 лица се убиени, а повеќе од 1.100 се повредени од стапувањето на сила на договорот за прекин на огнот од 10 октомври, со кој се прекина двегодишната израелска војна.
