Официјален претставник: „Над 120.000 луѓе кои бегаат од Украина се засолнија во Унгарија“

БУДИМПЕШТА (АА) ‒ Над 120.000 луѓе кои бегаат од војната во Украина се засолнија во Унгарија откако минатата недела започнаа руските напади врз Украина, изјави висок владин претставник.

Гергели Гуљас, шеф на Кабинетот на премиерот Виктор Орбан, изјави дека граничните премини на Унгарија со Украина се отворени и дека преминувањето продолжува.

Наведувајќи дека бројот на Украинците кои пристигнале во земјата од почетокот на војната надмина 120.000, Гуљас рече дека Будимпешта не сака да биде вмешана во војната и нема да дозволи оружјето да премине преку границата со Украина.

Тој рече дека Владата прави сѐ што е во нејзина моќ да ја осигура безбедноста на унгарското малцинство во Украина.

Претходно, унгарската канцеларија за странци пријави дека досега 676 Украинци аплицирале за азил.

Војната на Русија против Украина, која започна на 24 февруари, наиде на меѓународна осуда, а Европската Унија, Соединетите Американски Држави и Велика Британија воведоа строги финансиски санкции на Москва.

Според Агенцијата за бегалци на ОН, над 1 милион луѓе ја напуштиле Украина во соседните земји.