Падна пакистански хеликоптер во Авганистан: Екипажот во рацете на талибанците

КАБУЛ (АА) - На подрачјето на Логар, во Авганистан, се сруши пакистански хеликоптер, јавува Anadolu Agency (AA).

Портпаролот на гувернерот на Логар, Селим Салех потврди дека станува збор за пакистански хеликоптер и дека тој паднал на подрачје што го контролираат талибанците.

Според неговите зборови, по падот дошло до пожар во хеликоптерот, а сѐ уште не е познато каде е екипажот што се наоѓал во него.

Портпаролот на амбасадорот на Пакистан во Кабул, Актар Мунир, исто така ја потврди информацијата за падот на хеликоптерот и дека нема информации за пилотите.

Авганистанските официјални лица потврдија дека дале одобрение хеликоптерот да влезе во авганистанскиот простор. Во хеликоптерот се наоѓале шест Пакистанци и еден Русин. Постојат сомневања дека тие лица се наоѓаат во рацете на талибанците.

Талибанците сѐ уште не се огласија во врска со овој случај.