ИСЛАМАБАД (АА) - Пакистан денес соопшти дека речиси 800.000 илегални авганистански државјани се вратиле во својата матична земја во изминатата една година откако Исламабад започна акција за репатријација во ноември минатата година, јавува Анадолу.

Портпаролката на Министерството за надворешни работи, Мумтаз Захра Балоч, на неделниот брифинг со новинарите во Исламабад изјави дека процесот продолжува за да се обезбеди „успешно и непречено враќање“ на илегалните авганистански државјани.

„Досега, од ноември 2023 година до октомври 2024 година, во Авганистан се вратени 757.008 Авганистанци без документи“, рече таа, додавајќи дека во овој број се вклучени и оние што се вратиле доброволно.

Според податоците на ОН, околу 1,3 милиони Авганистанци уживаат статус на регистрирани бегалци во Пакистан, а 880.000 имаат правен статус за престој.

Пакистан започна акција против сите странци што нелегално престојуваат во земјата, наведувајќи го како причина порастот на милитантните напади. Исламабад вели дека антипакистанските терористички групи добиле засолниште во Авганистан, а тие ги засилиле нападите против пакистанските безбедносни сили и цивилите.

Високиот комесар на ОН за бегалци, Филипо Гранди, го посети Пакистан во јули и повика на напори за долгорочни решенија за Авганистанците во Пакистан.