Aida Cako
25 Септември 2025•Ажурирај: 26 Септември 2025
ГАЗА (АА) - Егзодусот на палестинските семејства од Газа продолжува, поради нападите на израелската Армија и копнената офанзива, јавува Анадолу.
Палестинските семејства се обидуваат да избегаат во јужните области на Појасот Газа преку улицата Рашид, носејќи само неколку работи и без јасна претстава каде да најдат засолниште.
Израелската Армија уби 63 лица и повреди неколку други во Појасот Газа вчера, според медицински лица.
Цивилната одбрана на Газа соопшти дека 22 лица, меѓу кои девет деца и шест жени, се убиени, а многу други се повредени во израелскиот воздушен напад насочен кон раселените цивили во населбата Ал-Дараџ во градот Газа.
Уште две лица ги загубија животите откако станбена зграда беше гранатирана во истата населба, изјавија медицински извори за Анадолу.
Во населбата Сабра во Газа, осум лица беа убиени, а други беа повредени, додека уште еден цивил беше убиен во населбата Ал-Римал од оган на израелската Армија.
Во населбата Тел Хава, Армијата гаѓаше возило во кое се превезуваа раселени Палестинци, при што се убиени две лица, а неколку други беа повредени.
Уште две лица беа убиени во израелските воздушни напади во населбата Шеџаја во истиот град.
На 21 септември, израелската Армија ги засили своите копнени операции во Газа, кои започнаа на 11 август, како дел од планот одобрен од Владата за постепено окупирање на Појасот Газа.
Во централниот дел од Појасот Газа, израелската Армија уби 11 Палестинци и повреди 17 други во воздушен напад насочен кон собир на цивили во близина на камп за раселени лица во бегалскиот камп Нусејрат.
Уште пет лица беа убиени, а многу други повредени, вклучувајќи жени и деца, во нападите насочени кон две куќи во истиот камп.
Девет баратели на помош беа убиени од израелски оган во близина на место за дистрибуција на помош во Рафа, во јужниот дел на Појасот Газа. Уште еден Палестинец беше убиен од воен оган во градот Хан Јунис, во јужниот дел на Газа.
Израелската Армија уби повеќе од 65.400 Палестинци, повеќето од нив жени и деца, во Газа од октомври 2023 година. Немилосрдното бомбардирање ја направи енклавата ненаселена и доведе до глад и ширење на болести.
