Папата Франциско го предводеше обредот по повод Велики Петок на речиси празниот Плоштад „Св. Петар“

РИМ (АА) - Папата Франциско, поглаварот на Римокатоличката црква, го предводеше традиционалниот обред за Велики Петок на скоро празниот Плоштад „Свети Петар“, пренесува Агенција Анадолија (AA).

Традиционалната церемонија е преместена од Колосеумот на Плоштадот „Свети Петар“, поради пандемијата на вирусот Ковид-19 од кој во Италија починаа 18.849 луѓе, вклучувајќи и 570 смртни случаи во текот на изминатиот ден.

Ватиканскиот медиум „Ватикан њуз“ („Vatican News“) јави дека црниот крст е носен околу обелискот на Плоштадот до вратата на базиликата.

Крстот го придружуваа петмина затвореници од северот на Падова, која е сериозно погодена од пандемијата, и пет здравствени работници од Ватикан.

Папата Франциско на крајот од церемонијата ги благослови сите верници во светот.

Велики Петок е христијански споменден кој му претходи на најголемиот христијански празник Велигден.