Пет земји-членки на Советот за безбедност на ОН се спротивставија на одлуката на Израел да ја окупира Газа

АНКАРА (АА) - Пет земји-членки на Советот за безбедност на ОН се спротивставија на одлуката за „понатамошно проширување на воените операции на Израел во Газа“, известува Анадолу.

Пред седницата на Советот за безбедност на ОН за Газа, постојаниот претставник на Словенија во ОН, Самуел Жбогар, објави заедничка изјава во име на Обединетото Кралство, Данска, Франција, Грција и неговата земја.

Во изјавата се осудува одлуката за „понатамошно проширување на воените операции на Израел во Газа“, што претставува кршење на меѓународното хуманитарно право, и се повикува на итно повлекување и Израел да не го спроведе планот.

Во изјавата се истакнува дека проширувањето на овие операции ќе ги загрози животите на сите цивили во Газа и ќе предизвика дополнителни страдања.

Се предупредува дека оваа одлука дополнително ќе ја влоши веќе катастрофалната хуманитарна ситуација во Газа и дека со нејзино спроведување се ризикува губење на животи и масовно раселување на Палестинците.

Истакнувајќи дека се продлабочува гладот во Газа, во соопштението се вели:

„Децата гладуваат. Гладот е толку силен што очајните цивили ризикуваат да бидат убиени на местата за дистрибуција на помош за да ги прехранат своите семејства“.

Во соопштението се посочува дека гладот во Газа е „криза предизвикана од човекот“ и дека е потребна итна акција за нејзино завршување.

Во соопштението се нагласува виталната важност меѓународните организации на граѓанско општество да можат да работат во Газа и се потенцира дека сите копнени патишта мора да бидат отворени за да се обезбедат основните потреби како што се прехранбени продукти, храна за бебиња, лекови, гориво и чиста вода.

Во соопштението се повикува на „дипломатија наместо војна“, и се нагласува потребата од преминување во акција за да се обезбеди траен прекин на огнот, ослободување на сите заробеници и решение со две држави.

- Израел донесе одлука да го окупира градот Газа

Израелскиот кабинет за безбедност го одобри планот за окупирање на градот Газа во северниот дел на регионот на 8 август.

Израелскиот премиер Бенјамин Нетанјаху, во интервју за Фокс њуз пред состанокот на кабинетот, изјави дека имаат за цел да го окупираат целиот Појас Газа. Сепак, во вестите за планот за окупација објавени во медиумите пред состанокот на кабинетот, се вели дека нападите ќе бидат извршени во фази.

Во вестите се вели дека окупацијата прво ќе започне во градот Газа, а потоа нападите ќе се прошират до палестинските бегалски кампови во централниот регион.