Претседателот на Јужна Кореја ѝ нареди на војската да ја казни Северна Кореја во случај на провокација

АНКАРА (АА) - Јужнокорејскиот претседател Јун Сук-Јол денеска на својата војска ѝ нареди брзо и силно да ја казни Северна Кореја доколку изврши каква било провокација, јавуваат локалните медиуми, пренесува Агенција Анадолија (АА).

„Претседателот ѝ нареди на нашата војска брзо и силно да ја казни Северна Кореја во случај на провокација“, соопшти Кабинетот на јужнокорејскиот претседател по неговиот состанок со највисоките воени команданти.

Тензиите на Корејскиот Полуостров постојано се зголемуваат од минатата година, откако Сеул и Пјонгјанг ги засилија вежбите за да ја покажат својата воена моќ.

Минатиот месец, САД, Јужна Кореја и Јапонија објавија планови за зајакнување на безбедносните односи и се согласија заеднички да се спротивстават на заканите од Северна Кореја доколку Пјонгјанг изврши уште едно нуклеарно тестирање.

САД и Јужна Кореја во неколку наврати ѝ понудија дијалог на Северна Кореја за да се намалат моменталните тензии на Корејскиот Полуостров, но Северна Кореја не одговори на тоа.