Путин: Партнерството на Русија со Туркије е во својот врв

МОСКВА (АА) - Руското партнерство со Туркије „е во својот врв, изградено на долгогодишно искуство“, истакна рускиот претседател Владимир Путин, јавува Анадолу.

„Двете страни се одлучни за понатамошно развивање на односите засновани врз принципите на добрососедство, партнерство и заемна корист“, рече тој.

Во Кремљ, Путин ги поздрави и ги прифати акредитивните писма од амбасадорите на 21 земја, меѓу кои и од турскиот амбасадор Танју Билгич и им честита на дипломатите за нивните нови функции.

Путин нагласи дека одржува постојан контакт со турскиот претседател Реџеп Таип Ердоган, разговарајќи за важни прашања поврзани со билатералните односи.

„Во енергетскиот сектор, руско-турската соработка е вистински стратегиска. Росатом, руската државна корпорација за нуклеарна енергија, напредува со изградбата на првата нуклеарна централа во Туркије, Акују. Ние (исто така) имаме блиска соработка во секторот за природен гас, вклучително и работата на гасоводите Син тек и Турски тек“, рече тој.

„Во тек се и напорите за формирање центар за дистрибуција на природен гас во Туркије, а имаме и разни интересни проекти и соработки во трговијата и високата технологија“, посочи рускиот претседател.

Путин го спомена одбележувањето на Денот на волонтерството во Русија и го истакна натпреварот во кој учествуваат волонтерски тимови од 95 земји.

Истакна дека тим од Туркије победил во категоријата за поддршка на семејства со ниски приходи.