ДАМАСК/ИСТАНБУЛ (АА) - Жителите на кампот Јармук во главниот град на Сирија, Дамаск, се обидуваат да ги лоцираат гробовите на своите роднини на гробиштата Јармук, кои беа уништени од соборениот режим на Башар ал-Асад и неговите поддржувачи, јавува Анадолу.
Израелските војници убиени во битката кај Султан Јакуб во 1982 година, која се случи во либанскиот регион Бека, во близина на границата меѓу израелската армија и сириските сили, беа погребани на старите гробишта на мачениците во кампот Јармук.
По опсадата на кампот во 2013 година, силите на режимот спроведоа операции за пребарување на гробиштата за да ги лоцираат останките на израелските војници што се закопани таму. Во текот на овие операции надгробните плочи беа скршени, а беа сменети и местата на кои се наоѓаа.
На гробиштата, каде што се погребани и 140 лица што починаа од глад при опсадата на кампот Јармук од страна на режимот на Асад, се наоѓаат останките на оние што се убиени додека траела опсадата на Бејрут во 1982 година, како и роднини на жителите на Јармук.
Жителите на кампот страдаат од болка поради тоа што не можат да ги пронајдат гробовите на своите најблиски, но се прават напори за повторна идентификација на местата за погребување.
Наел Хамид Абу Јасер, официјален претставник одговорен за гробиштата во кампот, за Анадолу изјави дека новооснованите гробишта почнале да ги користат по уништувањето предизвикано од режимот на Асад и неговите поддржувачи.
Објаснувајќи дека надгробните плочи на старите гробишта биле скршени и преместени, Абу Јасер рече дека гробиштата биле намерно цел на нападите.
„Ова уништување не беше случајно. Кампот имаше симболично значење како главен град на дијаспората. Гробовите беа систематски избришани за да се елиминира оваа улога и да се скријат трагите од израелските војници“, рече тој.
Истакнувајќи дека руските сили се распоредиле во областа за време на режимот, Абу Јасер рече дека „режимот и неговите поддржувачи копале гробови сè додека не ги пронашле гробовите на израелските војници и не ѝ ги предале на израелската Влада. Откако биле однесени телата, целосно ги отстраниле надгробните ознаки. Како резултат на тоа, станало невозможно да се знае кој каде е погребан.“
Тој го забележа огромното страдање на семејствата што се обидуваат да ги пронајдат гробовите на своите роднини.
„Некои семејства пребаруваат користејќи стари фотографии, но повеќето не наоѓаат одговори. Работиме на враќање на записите до кои можеме да пристапиме и официјално повторно да ги поставиме надгробните плочи.“
Абу Јасер рече дека на гробиштата има посебен дел за оние што починале од глад за време на опсадата на кампот.
„Веднаш зад мене е местото каде што се закопани лицата што починаа од глад. Во тоа време командантот на режимот Исам Захредин, кој го опколил кампот, не дозволил да има ни зрно ориз. Поради ова, повеќе од 140 луѓе умреле од глад.“
Во друг дел од гробиштата се борците што се убиени при опсадата на Бејрут.
„Ова е местото каде што се погребани 82 маченици. Некои се познати по име, а други се непознати. Палестинци, Арапи и Сиријци биле погребани еден до друг“, рече Абу Јасер.
Кампот Јармук е основан во 1957 година јужно од Дамаск за палестинските бегалци.
Кампот стана населба во која живееја над 100.000 Палестинци, а од избувнувањето на сириската граѓанска војна во 2012 година, таму имало интензивни судири.
Гробиштата, болниците, училиштата, станбените области и инфраструктурата во кампот Јармук беа оштетени. Денес кампот значително е уништен од бомбардирањата.
