Кремљ потврди дека средбата меѓу Путин и Трамп во Унгарија би можела да се одржи во рок од 2 недели

ИСТАНБУЛ (АА) - Кремљ денес потврди дека средбата во Унгарија меѓу рускиот претседател Владимир Путин и американскиот претседател Доналд Трамп би можела да се одржи во текот на наредните две недели, јавува Анадолу.

„Навистина би можело да се случи во рок од две недели или малку подоцна. Постои општо разбирање дека нема потреба ништо да се одложува“, изјави портпаролот на Кремљ, Дмитриј Песков, на брифинг за медиумите во Москва.

Трамп претходно потврди дека состанокот би можел да се одржи во Будимпешта во рок од две недели, откако делегациите на високо ниво ќе се сретнат следната недела. Тој го нарече својот вчерашен разговор со Путин „многу продуктивен“.

Помошникот на Кремљ, Јуриј Ушаков, изјави дека двајцата имале „многу суштински, но исто така и исклучително искрен и доверлив“ телефонски разговор.

Тој рече дека двајцата претседатели разговарале за можноста за одржување на уште една средба лице в лице и се согласиле дека претставниците од двете страни веднаш ќе почнат со подготовки за самит, во унгарската престолнина како потенцијално место.

Песков за новинарите изјави дека одлуката за избор на Унгарија за самитот била донесена заеднички, но дека логистиката на патувањето на Путин за состанокот сè уште не е јасна.

Што се однесува до образложението за изборот на Унгарија како можно место, Песков рече дека земјата, како членка на НАТО и на ЕУ, има „уникатна позиција во однос на својот суверенитет и во одбраната на сопствените интереси“.

Тој рече дека претседателите се подготвени да одржат таков состанок, но тврдеше дека подготовките за него треба да се одвиваат во фази и дека прашањето прво ќе биде дискутирано меѓу рускиот министер за надворешни работи Сергеј Лавров и американскиот државен секретар Марко Рубио.

„Постојат многу прашања - треба да ги одредиме преговарачките тимови“, рече Песков, исто така одбивајќи да коментира дали Путин и Трамп разговарале за ситуацијата околу Договорот „Нов СТАРТ“, кој истекува во февруари 2026 година.

На прашањето дали средба меѓу Лавров и Рубио би можела да се одржи и во Унгарија, Песков одговори: „Тие ќе преговараат и ќе ви кажат сами за тоа“.

Тој рече дека Путин, за време на телефонскиот разговор вчера рекол дека ставот на Русија за потенцијалните испораки на крстосувачки ракети со долг дострел „Томахавк“ на Украина од страна на САД е „кристално јасен“.

Путин претходно изрази загриженост поради испраќањето на американски ракети „Томахавк“ во Украина, тврдејќи дека тоа ќе ги „уништи“ американско-руските односи и ќе доведе до „сосема нова, квалитативно нова фаза на ескалација“.

Потсетувајќи на забелешките на Ушаков дека телефонскиот повик од четвртокот бил инициран од руска страна, Песков рече дека разговорот бил предложен од Москва по патувањето на Трамп на Блискиот Исток. „И првата мисла на претседателот Путин беше да му честита на Трамп за овој успех“, додаде тој.