САД се противат на напорите на Палестина да стане членка на ОН

ВАШИНГТОН (АА)

Соединетите Американски Држави (САД) денес се спротивставија на напорите на Палестина да стане полноправна членка на Обединетите нации (ОН), велејќи дека палестинската држава треба да се формира преку преговори, а не во ОН, јавува Анадолу.

„Секогаш јасно стававме до знаење дека го поддржуваме формирањето на независна палестинска држава“, изјави портпаролот на Стејт департментот Метју Милер за новинарите, додавајќи дека државниот секретар Ентони Блинкен бил ангажиран во „многу интензивна дипломатија“ во текот на изминатите неколку месеци за да се воспостави палестинска држава со безбедносни гаранции за Израел.

„Тоа е нешто што треба да се направи преку директни преговори меѓу страните, кон што се стремиме во овој момент, а не преку Обединетите нации“, додаде Милер.

Владата на Палестина во вторникот испрати писмо до генералниот секретар на ОН, Антонио Гутереш, во кое бара повторно разгледување на барањето за членство во оваа организација.

„Во врска со апликацијата на државата Палестина за членство во Обединетите нации во документот S/2011/592 од 23 септември 2011 година, имам чест да побарам повторно да се преиспита членството на Палестина во Советот за безбедност во април 2024 година“, наведе во писмото палестинскиот пратеник во ОН, Ријад Мансур.

Мансур рече дека би бил благодарен доколку Гутереш го проследи барањето до Советот за безбедност на ОН што е можно поскоро.

Палестина беше прифатена како држава набљудувач од Генералното собрание на ОН во 2012 година, дозволувајќи му на нејзиниот претставник да учествува во дискусиите и организациите на ОН, но без можност за гласање.

Според Повелбата на ОН, државите се примаат како членки во ОН со одлука на Генералното собрание по препорака на Советот за безбедност.