СЗО: Газа се соочува со голем ризик од епидемии поради влошувањето на ситуацијата

ЖЕНЕВА (АА) - Светската здравствена организација, повикувајќи на прекин на огнот, предупреди на огромен ризик од епидемии во Газа поради тековните израелски напади.

„Постои огромен ризик од големи епидемии. И ние веќе ги гледаме доказите за тоа“, изјави портпаролката на СЗО, Маргарет Харис, во интервју за Анадолу, нагласувајќи дека борбите мора да престанат.

„Потребен ни е прекин на огнот“, истакна Харис.

„Ситуацијата дефинитивно се влошува, ја имате комбинацијата од секој фактор што му штети на здравјето на луѓето“, рече таа, истакнувајќи дека времето е студено и влажно и дека 90 отсто од населението е ранливо на тоа. „Тие, исто така, не знаат од каде да се снабдат со доволно храна“, додаде таа.

„Населението не спие. И ова му штети на вашиот имунолошки систем“, истакна Харис и додаде: „Луѓето се преплашени. Тие не знаат што ќе се случи.“

Таа нагласи дека „нема безбедно место“ во Газа и дека луѓето не можат да стигнат ни до болница кога се повредени.

Палестинската Црвена полумесечина не може да обезбеди амбулантни возила на северот, рече портпаролката: „Тоа едноставно не е можно. Така, луѓето што се повредени таму не добиваат медицински услуги.“

Израел го бомбардира Појасот Газа од воздух и од копно, воведе опсада и изврши копнена офанзива како одмазда за прекуграничниот напад на Хамас на 7 октомври.

Досега во израелските напади, според здравствените власти на Газа, загинале најмалку 19.667 Палестинци, а 52.586 се повредени.

Според официјалните податоци, бројот на загинати Израелци во нападот на Хамас на 7 октомври изнесува 1.200, додека над 130 заложници сè уште се држат од палестинската група во Газа.