СЗО ги отфрли тврдењата на Трамп дека парацетамолот е поврзан со аутизмот

ЖЕНЕВА – Светската здравствена организација (СЗО) денес ги отфрли тврдењата на американскиот претседател Доналд Трамп дека постои врска меѓу употребата на парацетамол во бременост и аутизмот, нагласувајќи дека „доказите остануваат неконзистентни“, јавува Анадолу.

„Иако некои опсервациски студии укажале на можна асоцијација меѓу пренаталната изложеност на ацетаминофен (парацетамол) и аутизмот, доказите и понатаму остануваат неконзистентни“, изјави портпаролот на СЗО, Тарик Јашаревиќ, пред новинарите во Женева.

Тој додаде дека „повеќе студии не откриле таква поврзаност“.

Јашаревиќ, нагласувајќи дека доколку врската помеѓу парацетамолот и аутизмот беше силна, рече дека таа веројатно би била постојано забележана во повеќе студии.

„Овој недостиг на репликабилност бара претпазливост при извлекувањето причинско-последични заклучоци за улогата на ацетаминофенот кај аутизмот“, рече тој.

Портпаролот предупреди дека лековите секогаш треба да се користат со претпазливост за време на бременоста, особено во првите три месеци.

„Важно е жените да продолжат да ги следат советите на своите лекари или здравствените работници, кои можат да ги проценат индивидуалните околности и да препорачаат неопходни лекови“, додаде Јашаревиќ.