Специјалниот американски пратеник за Сирија се сретна со либанскиот претседател во Бејрут

ИСТАНБУЛ (АА) – Американскиот специјален пратеник за Сирија, Том Барак, денес се сретна со претседателот на Либан, Жозеф Аун, во главниот град Бејрут, јавува Анадолу.

Од Кабинетот на либанскиот претседател преку американската компанија за социјални медиуми X соопштија дека на средбата присуствувала и заменичката на специјалниот пратеник за Блискиот Исток, Морган Ортагус, заедно со придружна делегација во палатата Баабда, источен Бејрут.

Не беа објавени дополнителни детали околу разговорите.

Барак, кој истовремено е и амбасадор на САД во Турција, пристигна во Бејрут синоќа, во неговата четврта посета од јуни досега.

Последната посета доаѓа по десет дена откако либанската Влада ги усвои целите на Мапата на патот предложена од него, потег што наиде на остро противење од Хезболах, кој одби да се разоружа.

Граничните судири меѓу Израел и Хезболах започнаа во октомври 2023 година и ескалираа во целосна војна во септември 2024 година. Во конфликтот се убиени околу 4.000 лица, меѓу кои и лидерот на Хезболах, Хасан Насралах, а околу 17.000 беа повредени.

Прекинот на огнот беше постигнат во ноември, но израелските сили продолжија со речиси секојдневни напади во јужен Либан, тврдејќи дека ги целат активностите на Хезболах.

Според договореното, Израел требаше целосно да се повлече од јужен Либан до 26 јануари, но рокот беше продолжен до 18 февруари откако Тел Авив одби да се придржува. Израел сè уште одржува воено присуство на пет погранични позиции.