ЕРУСАЛИМ/АНКАРА (АА) - Таткото на израелскиот војник, кој се држи во Газа, денес го обвини премиерот Бенјамин Нетанјаху дека ги напуштил заложниците во корист на продолжување на војната за неговите политички интереси, пренесува Анадолу.

„Ги слушавме зборовите на Нетанјаху од Плоштадот на заложниците [во Тел Авив] и сме длабоко разочарани“, изјави за дневниот весник „Маарив“ Хагаи Ангрест, татко на војникот Матан.

„Во светот, сите велат дека прекинот на огнот и враќањето на заложниците треба да бидат главен приоритет. Сепак, гледаме премиер кој ги напушта војниците и испраќа повеќе во борба“.

„Ни беше кажано дека оваа војна нема да заврши без нив. Но сега се чини дека Нетанјаху го избира својот политички опстанок наместо животите на оние кои се во заробеништво“, рече тој. „Целата земја го поддржува враќањето на заложниците“.

Синоќа Нетанјаху во телевизиско обраќање тврдеше дека „нема избор“ освен да се продолжи војната во Газа, тврдејќи дека договорот за прекин на огнот со Хамас „ќе ги поткопа придобивките од војната“.

Тој рече дека Хамас го отфрлил предлогот кој вклучувал ослободување на половина од живите израелски заробеници и многумина од мртвите, во замена за завршување на војната, услов што Нетанјаху го означи како „неприфатлив“.

Лидерот на Хамас во Газа, Калил Ал-Хаја, во четвртокот објави подготвеност на групата веднаш да започне „сеопфатни пакет-преговори“ со Тел Авив за ослободување на сите заложници во замена за договорен број палестински затвореници, прекин на војната, целосно израелско повлекување од Газа, почеток на обнова и укинување на блокадата.

Портпаролот на израелскиот премиер вчера рече дека враќањето на сите израелски заробеници во рамките на еден договор е „невозможно“.

Израел смета дека 24 од 59 преостанати заложници во Газа се живи. Во исто време, над 9.500 Палестинци се наоѓаат во израелските затвори, со голем број извештаи за нивна тортура, глад и медицинско занемарување што доведува до смрт на затворениците, според палестински и израелски организации за човекови права.

Над 51.200 Палестинци се убиени во Газа во бруталната израелска офанзива од октомври 2023 година, повеќето од нив жени и деца.

Меѓународниот кривичен суд во ноември минатата година издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.