Трамп: Европа потроши повеќе на руска нафта и гас отколку на одбраната на Украина

ВАШИНГТОН (АА) - Европа потроши повеќе за руска нафта и гас отколку за одбрана на Украина од Русија, изјави вчера американскиот претседател Доналд Трамп, јавува Анадолy.

„Европа потроши повеќе пари за купување руска нафта и гас отколку што потроши за одбрана на Украина“, изјави тој на „Трут сошал“.

Земјите членки на ЕУ купиле руска нафта и гас во вредност од 21,9 милијарди евра во третата година од војната против Украина, според проценките на Центарот за истражување на енергија и чист воздух.

Сумата е поголема од 18,7 милијарди евра колку што 27-члениот блок ѝ додели на Украина за финансиска помош во 2024 година, покажаа податоците од Киелскиот институт за светска економија (IfW Kiel).

Трамп ја прекина воената помош за Украина по жестоката дискусија во Овалната соба со неговиот украински колега Владимир Зеленски, објавија медиумите вчера, цитирајќи неименувано официјално лице од Белата куќа.

Тој сака брз договор за завршување на тригодишната војна, но Зеленски се залага за безбедносни гаранции.

Европските лидери се обидуваа да му го претстават на Трамп својот мировен план, а ЕУ денес објави план за „Превооружување на Европа“ од 800 милијарди евра за зголемување на трошоците за одбрана во текот на годините и за обезбедување итна поддршка за Украина.