Muhammed Sabry
23 Октомври 2023•Ажурирај: 24 Октомври 2023
АЛ-КУДС/ЕРУСАЛИМ (АА) - Тројца израелски министри размислуваат да поднесат оставка за да извршат притисок врз премиерот Бенјамин Нетанјаху да ја преземе одговорноста за нападот на Хамас врз израелските погранични градови на 7 октомври, објави денес весникот „Једиот Ахронот“, пренесува Анадолу.
Во весникот не се наведени имињата на тројцата министри кои бараат Нетанјаху да поднесе оставка.
„Не можеме да веруваме во оваа ситуација. На Нетанјаху едноставно не смее да му се дозволи да продолжи“, рече еден од министрите, цитиран од весникот.
Неколку израелски безбедносни службеници и политичари признаа дека не можеле да го предвидат нападот.
„Нетанјаху одбива да ја преземе одговорноста за настаните од 7 октомври, иако малкумина веруваат дека тој ќе го издржи бранот на гнев што го чека по крајот на војната“, пишува весникот.
Израелците организираа протести барајќи оставка на Нетанјаху.
Израел започна немилосрдна кампања за бомбардирање на Појасот Газа по прекуграничниот напад на Хамас врз израелските погранични градови.
Речиси 6.500 луѓе загинаа во конфликтот, меѓу кои 5.087 Палестинци и над 1.400 Израелци.
