Ekip
19 Јуни 2023•Ажурирај: 20 Јуни 2023
КИЕВ (АА) - Ана Маљар, заменик-министерка за одбрана на Украина, извести дека бројот на населени места ослободени за време на двонеделната офанзивна операција на јужниот фронт е зголемен на осум, јавува Анадолија.
Таа преку својот профил на социјалните мрежи соопшти дека украинската Армија извршила и офанзивни и одбранбени операции минатата недела.
Наведувајќи дека Русите распоредиле дополнителни трупи на исток за да го запрат напредувањето на украинските сили во правец на Бахмут, Маљар рече:
„Интензитетот на судирите во оваа насока се намали минатата недела, но судирите продолжија. Се случија вкупно 41 судир и нашите војници напредуваа во неколку области.“
Истакнувајќи дека минатонеделниот напад се случил во неколку правци на јужниот фронт, Маљар додаде:
„За време на двонеделните офанзивни операции во правец на Бердјанск и Мелитопол, одбранбените сили на Таврија ослободија вкупно осум населени места, и тоа Новодаривка, Левадна, Сторојве, Макаривка, Благодатне, Лобково, Нескучна и Пјатихатка. Нашите трупи напредуваат осум километри. Повратената копнена површина изнесува 113 километри квадратни.“
Во соопштението на Генералштабот на Украина се наведува дека во последните 24 часа Русите извршиле 59 воздушни напади врз позиции и населби на украинските војници, а над 100 проектили биле истрелани од противвоздушната одбрана и тенковските ракетни системи.
Се наведува дека се убиени и ранети цивили, вклучувајќи и деца, оштетена е инфраструктурата и уништени се повеќе од 20 училишта и куќи.
Украинските воздухопловни сили во последните 24 часа 10 пати ги бомбардираа областите каде што се концентрирани Русите.
„Нашите војници уништија непријателски хеликоптер Ка-52, три беспилотни летала Шахед и седум извидувачки беспилотни летала“, се вели во соопштението.
Се наведува и дека украинските ракетни и артилериски единици погодиле два руски командни центри, четири противтенковски ракетни системи, две подрачја каде што биле концентрирани војници и опрема и две складишта за муниција.
