Украинскиот претседател потпиша декрет за одбивање на преговори со Путин

АНКАРА (АА) - Украинскиот претседател Владимир Зеленски денес потпиша декрет во кој се наведува дека нема да се водат преговори со рускиот претседател Владимир Путин, известува Агенција Анадолија (АА).

Последниот потег на Киев се случи откако рускиот парламент ги ратификуваше договорите за анексија на украинските региони Доњецк, Херсон, Луганск и Запорожје.

Минатиот петок, рускиот претседател Владимир Путин потпиша договор со сепаратистичките власти на четири отцепени украински региони за приклучување кон Русија, по референдумите одржани од 23 до 27 септември.

Гласањето се случи по повеќе од седум месеци од руската инвазија на Украина и започнувањето на војната на 24 февруари.

Референдумите беа осудени од меѓународната заедница, при што земјите од Европа и САД ги нарекоа „измама“ и нагласија дека нема да ги признаат.