Asiye Latife Yılmaz
31 Октомври 2025•Ажурирај: 03 Ноември 2025
ИСТАНБУЛ (АА) – Ураганот Мелиса однесе најмалку 50 човечки животи низ Кариби откако ги погоди Јамајка, Хаити и Куба, објави „Си-би-ес“ денес, пренесува Анадолу.
Според првичните податоци, најмалку 30 лица загинале на Хаити, 19 во Јамајка и две во Доминиканска Република, а Куба се соочува со тешки последици и голема материјална штета, што ја прави една од најсилните атлантски бури во последните години.
Американскиот национален центар за урагани денес соопшти дека ураганот се движел над отворените води на Атлантикот откако рано наутро поминал покрај Бермуди со максимални ветрови од 145 километри на час.
„Се очекува подоцна во текот на денот Мелиса да премине во силен посттропски циклон, со постепено слабеење за време на викендот“, соопшти центарот.
Ураганот предизвика значителни поплави, оштетувања и евакуации во делови од Доминиканска Република, Хаити, Јамајка и Куба, а островите Теркс и Каикос, исто така, беа ставени под предупредување.
Во градот Сантијаго де Куба, втор по големина во земјата, има големи оштетувања, а во југозападниот регион на Јамајка – Сент Елизабет – цели населби се покриени со кал и остатоци.
Американскиот државен секретар Марко Рубио вчера изјави дека САД се подготвени да обезбедат итна хуманитарна помош за населението на Куба по разорниот удар на ураганот.
