Франција го осуди убиството на вработен во нивното МНР во израелски воздушен напад на Газа

ПАРИЗ (АА) - Франција го осуди убиството на вработен во Министерството за надворешни работи на таа земја во израелскиот воздушен напад на Појасот Газа, пренесува Анадолу.

„Вработен во министерството им подлегна на повредите здобиени во израелскиот воздушен напад на Рафа, на југот од Појасот Газа“, соопшти Министерството за надворешни работи на Франција.

Жртвата била сместена во куќата на колега од францускиот конзулат, која е бомбардирана во средата вечер. Во нападот беа убиени повеќе од 10 лица.

„Нашиот колега работи за Франција од 2002 година. Франција го осудува бомбардирањето на згради кое предизвика и неколку други цивилни жртви“, истакнаа од француското МНР, изразувајќи сочувство на семејството на загинатиот.

- Израелски напади на Појасот Газа

Израел започна немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7 октомври.

На 24 ноември, во 07:00 часот по локално време, стапи на сила четиридневната хуманитарна пауза договорена меѓу Хамас и Израел, која потоа беше продолжена за уште три дена.

На 1 декември (петок), по завршувањето на хуманитарната пауза, израелската војска продолжи со своите интензивни напади низ Појасот Газа.

Од почетокот на израелските напади на Појасот Газа на 7 октомври досега се убиени над 18.800 Палестинци, а ранети се повеќе од 51.000 лица, објавија здравствените власти на палестинската енклава.

Меѓу убиените најмалку 8.000 се деца, а 6.200 се жени.

Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.

„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.